Денес разговараме со двајца млади органски производители кои не решија да заминат од државата, туку да ја продолжат приказната на нивниот татко кој го носи органскиот сертификат број 001 кај нас. Кристијан и Горан Балески се од Валандово и во нашата продавница може да ги вкусите нивните бадеми, компири, свежите и сушените јапонски јаболка кои се одликуваат со врвен квалитет.
Колку време произведувате на органски начин и кои производи се сертифицирани?
Од кога паметам за себе и моето семејство се занимаваме со производство исклучиво на органски производи. Првиот органски сертификат за органско јапонско јаболко во Македонија го има добиено татко ми во 2001 година за нашиот прв насад од 4000 м2. Моето семејство продолжи да го унапредува и промовира органското земјоделство како начин на живот и во моментов располагаме со органски јапонски јаболка, бадеми, сливи, калинки, компир, ајварка и тиква се тоа распространето на околу 22 хектари.
Од каде дојдоа мотивацијата и идејата да станете првиот сертифициран органски производител?
Татко ми како биолог уште пред 20 години имаше сфатено колку опасна хемија во тоа време ставале производителите за да произведат 1 кг производ, па решил да направи промена и да биде двигател на македонското органското производство.
Каков одговор добивте од опкружувањето кога се сертифициравте?
По првиот сертификат почнавме да ги охрабруваме другите поизводители околу нас да почнат со органско производство па така го креиравме првото здружение “Органик Каки” со кое бевме редовен посетител на органскот саем BioFach во Нинмберг и извозник за COOP Швајцарија. По 20 години активна работа минатата година креиравме нов модел на работа односно ја креиравме “Прва Органска Задруга” со 15 членови и брендот B-Organic. На тој начин ги здруживме количините на органско производство за зголемување на конкурентноста. Па, така, почнавме да извезуваме во Германија, Хрватска и Словенија.
Какви промени гледате во локалната свест за органскиот начин на производство од моментот кога започнавте да се занимавате со оваа област, па се до денес?
Порано луѓето немаа доволен пристап до информации што всушност значи органско и која е разликата со конвенционалното производство, но со текот на времето и брзиот пристап на информации ги осознаа и почнаа да ги ценат придобивките од производството и исхраната со локална органска храна. Па, така, ако пред 20 години не можевме да продадеме еден килограм поради повисоката цена на производство, сега постојано додаваме нови култури на барање на нашите задоволни купувачи.
Што би им препорачале на оние кои сега започнуваат да се занимаваат со органското производство?
Би им препорачал да бидат упорни и да се трудат да креираат квалитетни продукти. Производството на органска храна е здраво, прво, за самите производители, а потоа и за купувачите што ја конзумираат. Ги охрабрувам сите што сакаат да почнат да одгледуваат органски производи бидејќи органското е начин на живот при кој што пристојно се живее во симбиоза со природата.
Многумина од младите денес одлучуваат иднината да ја продолжат во странство. Зошто одлучивте да останете тука да се занимавате со органско производство?
Знаете, кога ќе посадите некое растение и ќе го гледате како расте, се грижите за него и уживате во неговите плодови, тешко е да го оставите и да отидете некаде далеку, во некоја друга земја која не е дом. Ние со многу труд успеавме да создадеме одржлив начин на живот со природата кој не би го менувал за ништо друго 🙂
