Ивона Бару
Архитект на иднината
Дипломиран архитект по професија, но еко активист по пасија. Голем љубител на животни (кои често и ги спасува), одгледувач на зеленила во саксии на тераса од 2.5 м2, минималист и перфекционист, поддржувач на се што значи одржлив начин на живот, особено делот на изградба на одржливи еко заедници од природни материјали.
Аматерски готвач и уживач во добра и здрава храна. Ако може да избере, го бира велосипедот пред автомобилот како еколошко урбано превозно средство. Како ко-основач на Добра Земја, горда е на сите кои придонесоа на било каков начин Добра Земја да биде тоа што е денес, а со тоа заедно иницираа промени во општеството што значат пријателство со природата за гржлив и одржлив развој.
Сонува да има своја градина надвор од урбаната џунгла каде ќе живее во согласност со природата, без да узурпира и доминира и верува дека добрите практики денес можат направат промени за подобро утре.
Иво Бару
Гуру за членови
Посветен татко на малиот Алекс… некогаш забавен, некогаш отсутен, смирен и нервозен, некогаш генијален и почесто глуп… но, никогаш досаден. Mожеби најдобриот татко во регионот.
Наградуван филмски режисер, својата реализација ја наоѓа во активизмот. Основач е на независни граѓански иницијативи: Задруга Артикултура, АКСЦ, Дебатно кино Контра Кадар, ЛД Солидарност, Социјален центар Дуња, Движење АМАН, Маршот за Мир, Добра Земја кога беше андерграунд итн.
Верува дека подобар свет е возможен, само што треба да направиме конкретни чекори за да го креираме. Таков чекор се задругите.
Ана Тодоровска
Медиа алхемичар
Дипломиран психолог и визуелен артист, докажан мултитаскер и буквар за вегетаријански рецепти.
Маратонец во студентски активизам, списанија, статии, учесник во радио и ТВ емисии, ко-основач на културните иницијативи Отворен куфер, АКСЦ, Коприва Колектив.
Планетата Земја ја сфаќа како единствен, жив организам од кој сме дел. Страсен кампер и патувач. Најголем кошмар ѝ е пластиката, особено таа за една употреба. Во слободно време организира групи и настани за размена со антиконзумеристички карактер.
Верува дека патот кон подобар свет е еволуција на свеста. Потајно сонува за анархистичка револуција.
Бобан Ристоски
Џедај за квалитет
Боби е енергија во постојано движење. Фанатик за велосипед како превозно средство, велосипедски трки, планински велосипедизам… па, за сé што е поврзано со велодипед.
Секој производ, пред да се најде во вашата платнена торба или членска кошничка, минува под неговото будно око.
Љубител на природата и планинските врвови. Посветен поборник за еколошко и органско производство за што сведочи неговата сопствена градина која секој викенд ја посетува во Тетовскиот регион.
Верува дека подобар свет е можен со труд и личен пример.
Билјана Трајковска
Капетан за кошнички
Грижлива мајка, вистински тимски играч и гласен бранител на обесправените. Билјана е поддржувач на сите иницијативи во чие јадро е стремежот кон чиста животна средина.
Главен и одговорен уредник за изгледот на нашата продавница, беспрекорната услуга и уредните членски кошнички. Вистински вљубеник во природата и одржливите практики, отсликано во нејзината домашна градина, каде одгледува еколошки градинарски култури за сопствена употреба.
Верува дека со соработка и солидарност денес може да изградиме подобро утре.
Томислав Трајков
Нинџа за производство
Дипломиран географ по професија и вистински вљубеник во природата по вокација. Докажан извидник и планинар, кој својата пасија и љубов кон природата ја насочува кон градење и управување на фамилијарна органска фарма во близина на Свети Николе.
На “Фармата на Дедо Ангел“ активно е посветен кон учење на тајните на пчеларството, овоштарството, производство на био хумус од калифорниски црви и градинарството. Знаењето и искуствата стекнати на својата фарма несебично ги става во функција на подигнување на свесноста за органско одржливо производство на храна.
Верува дека индивидуалната и колективна трансформација од ЕГО (=мислам само за себе и својот успех без разлика на последиците кон заедницата) кон ЕКО (=мислам за себе и личниот успех во баланс со одржливиот развој на заедницата и грижа за идните генерации) може да го направи светот подобро место за живеење.
