Веројатно веќе сте запознаени со нашиот славен модел на неделна органска кошничка. Четврток е денот кој го посветуваме исклучиво на членовите на задругата кои секоја недела подигнуваат органска кошничка составена од свежи и сезонски производи. Ова е само еден вид на имплементација на моделот наречен CSA (Community Supported Agriculture) или земјоделство поддржано од заедницата.
Што е земјоделство поддржано од заедницата?
И покрај тоа што сме навикнати во супермаркетите во секое време да ги наоѓаме сите производи, тој модел на прехрана не е одржлив на долг рок. Не е тајна дека сезонските локални производи не само што се најдобри за заштита на средината, туку и за нашите тела, поради поголемата хранлива вредност. Моделот на членство со подигнување органски кошнички подразбира месечна претплата кон локални и сезонски зеленчуци и овошја.
Во овој случај, задругата претставува сврзно ткиво меѓу локалните производители на органска храна и заедницата на членови кои се потрошувачи на истата. Органската кошничка прави баланс на потребите на сите страни во овој триаголник:
1. Производителите нудат чиста храна произведена на еколошки начин, а добиваат сигурен откуп и фер откупна цена преку целата година
2. Членовите нудат континуирана поддршка на локалното органско производство преку целата година со зачленување и месечната претплата, а добиваат пониски цени, приоритет и сигурни количини од најсвежите производи, пристап до поретките производи и директно влијание врз храната која ја конзумираат
3. Задругата нуди мрежа на директен контакт меѓу сите страни, проверка и контрола на квалитетот на производите и инвестиција во локалната заедница, а добива поддршка во зголемување на палетата производи, бројот на нови производители и популаризација на моделот на одржлив систем на прехрана
Кошничката е предизвик за здрав и балансиран живот
Содржината на стандардната, која е достапна во две варијанти е однапред одредена од задругата, со право за замена на еден производ кој не му одговара на членот. Честопати, членовите се соочуваат со производи кои дотогаш не ги пробале или пак, не знаат како да ги употребат во кујната. Ова е еден убав предизвик за поразновидна исхрана, како и создавање заедница која постојано разменува совети, искуства, идеи и рецепти.
Процесот на пазарување е обратен: наместо однапред да морате да ги планирате оброците, а потоа да ги набавите состојките заедно со уште еден куп непотребни нешта, ја добивате својата готова кошничка со свежи зеленчуци и овошја кои ве предизвикуваат да експериментирате во кујната со разни супи, салати, смути напитоци и богати ручеци. Сето тоа, шарено, хранливо и здраво!
Какви кошнички се достапни во Добра Земја?
1. Семејна органска кошничка
- се подигнува секој четврток
- нуди пристап до членски цени (-30%)
- содржи до 10 сезонски производи
- избор меѓу два типа на кошнички
- можност за замена на 1 производ
- нуди приоритет на производи
- пристап до ексклузивни производи за членови
- можност за посета на производители
- можност за достава до дома
2. Партнерска органска кошничка
За овој тип на кошничка потребно е да најдете партнер со кој би ја подигнувале наизменично преку една недела. Секој партнер се води како засебен член и има пристап до членските цени. Таа вклучува:
- подигнување секој втор четврток
- членски цени (-30%)до 10 сезонски производи
- избор меѓу два типа на кошнички
- замена на 1 производ
- приоритет на производи
- пристап до ексклузивни производи за членови
- можност за посета на производители
- можност за достава до дома
3. Флексибилна органска кошничка
- без обврска за подигнување секој четврток
- нечленски цени
- производи и количини по сопствен избор
- приоритет на производи
- пристап до ексклузивни производи за членови
- можност за посета на производители
- достава до дома
4. Пробна органска кошничка
Доколку не сте сигурни дали ви одговара овој модел, нудиме еден пробен месец без да се зачлените. Тоа вклучува:
- подигнување секој четврток (вкупно 4 четвртоци)
- 4 кошнички пресметани по членски цени
- членски цени за дополнителни производи
- приоритет на производи
- можност за достава до дома
Секоја кошничка е во вредност од 500 денари. Годишното членство изнесува 1800 денари и важи од датумот на уплата до истиот датум следната година. Со тоа, придонесувате во потрагата по нови производители, посети и тестирање на производи.
Доколку сте заинтересирани да станете дел од оваа заедница, исконтактирајте не` на info@dobrazemja.mk
