Кељот е еден од најпопуларните органски производи во Добра Земја, но често се соочуваме со прашањето – како се јаде ова чудо?
Најнапред, да споменеме неколку од причините зошто е еден од најздравите зеленчуци:
- еден од најдобрите извори на витамин К, кој е клучен за процесот на засирување на крвта при повреди и рани, но и врзување на калциумот за коските
- изобилува со бета-каротен, антиоксидант кој организмот го претвора во витамин А, важен за очите
- го намалува холестеролот, а со тоа и ризикот за срцев удар
- го надминува портокалот со присуство на витамин Ц, кој е важен за имунитетот и производството на колаген во телото
- побогат е со минерали како калциум, магнезиум и натриум отколку спанаќот
Ги издвојуваме следните предлози за кои нема да ви треба повеќе од половина час:
Песто од кељ и магдонос / 15 мин.
- 1 китка листови кељ со отстранети дршки
- половина рака магдонос
- 150 гр. непечени бадеми
- 2 чешниња лук
- 4 лажици маслиново масло
- 2 лажици сок од лимон
- сол и бибер
Подготовка:
Кељот се вари во зовриена вода 1 минута, а потоа се префрла во ладна вода и се цеди. Во блендер се мешаат бадемите (најдобро да бидат отстоени во вода една вечер), лукот, маслото, лимонот, солта, биберот, магдоносот и кељот додека не се добие компактна смеса. По потреба може да додадете уште масло или вода доколку сакате да ја разредите смесата. Се служи како додаток на шпагети или макарони, најдобро е да бидат полнозрнести.
Пица со кељ (2 порции) / 25 мин.
- 2 теста за пица
- 3 лажици маслиново масло
- 1 китка листови кељ (одвоени од дршките)
- 2 чешниња лук, ситно исецкани
- 1 лажичка мешан зачин
- 1 голем домат, исецкан на кругови
- сол и зачини по избор
- изрендан пармезан по желба
Подготовка:
Се загрева маслиновото масло на тивок оган и 3-4 минути се пропржуваат листовите кељ со сол, лук, зачини и 2 лажици вода, се додека водата не испари и се трга од оган. Во меѓувреме, се загрева рерната на 200 степени. Тестото се премачкува со малку масло, се додава пропржениот кељ и се редат круговите домати. Се пече додека тестото да зарумени. Потоа, се нанесува пармезанот на површината.
Чипс од кељ / 12 мин.
- 2 китки кељ
- маслиново масло
- сол
Подготовка:
Кељот се мие и се отстрануваат дршките. Листовите се кинат на произволни парчиња и секое од нив се „масира“ со маслиново масло. Листовите се редат во тава така што нема да се поклопуваат и се посипуваат со сол (може да се додадат зачини по желба). Кељот се пече во претходно загреана рерна на 170 степени, 10 минути додека да дехидрира и стане крцкав.
Крем супа од кељ / 20 мин.
- 1 китка кељ
- 3 средни компири исецкани на коцки
- 1 главица кромид, исецкана
- 2 чешниња лук, ситно исецкани
- 3 лажици мешан зачин
- сол, бибер, црвен пипер
- масло
- 1 лажица павлака по желба
Подготовка:
Во длабок сад со малку масло се пропржуваат кромидот и лукот и се додаваат компирите. Се додаваат 3 шолји вода со зачини и се вари 10 минути. Во меѓувреме, ги отстрануваме дршките од кељот и ги сецкаме листовите. Во садот го додаваме кељот и една лажица павлака за да добиеме кремаста смеса и се готви уште 5 минути, додека да омекнат компирите и кељот. Смесата се префрла во блендер, или се процесира со рачен блендер додека не се добие хомогена смеса во вид на крем супа. Може да се додадат семки од тиква како декорација.
